唸歌 ê 起源 kap 歷史

唸歌 ê 起源 ē-tàng 追溯到清代台灣， hit 時 ê 民間藝人（號做「歌仔先」）走街串巷，用月琴抑是絃仔伴奏，吟唱用台語寫 ê 歌仔冊。 Chiah-ê 歌仔冊用漢字書寫，記載著民間故事、歷史典故、倫理道德，以及對時政 ê 褒貶。

日人仔時代，唸歌隨著留聲機 kap 唱片工業 ê 興起大放異彩， chē-chē 歌仔先留落來珍貴 ê 78轉曲盤錄音， chiah-ê 作品到今仔日 iáu-koh 是研究台灣音樂史 ê 重要文獻。

唸歌 ê 藝術形式

唸歌 ê 演唱形式真多元，主要分做：

• 江湖調（Kang-ô͘ tiāu）：上基本 ê 唸歌曲調，旋律簡單，真好填詞演唱。
• 七字調：用七字句做基本格式，是台灣歌謠上普遍 ê 韻律形式。
• 都馬調：源自中國福建，節奏活潑，廣受民間喜愛。
• 褒歌（Po-koa）：即興對唱 ê 褒貶之歌，展現歌仔先 ê 機智 kap 才情。

唸歌 kap 台語文化 ê 關係

唸歌 m̄-nā 是一種音樂形式， iā 是台灣語言文化 ê 載體。歌仔冊用全台語書寫，保留了 chiok-chē 珍貴 ê 台語詞彙、諺語 kap 俚語。戰後國語政策 ê推行 hō͘ 唸歌逐漸式微， m̄-koh mā 因為按呢， hō͘ 唸歌成做保存台語語音 kap 文化 ê 重要媒介。

當代 ê 唸歌復興運動

近年來，隨著台語文化復振運動 ê 推展，一批有識之士投入唸歌 ê 學習 kap 傳承工作。台灣唸歌文化協會 ê 成立，正是 tī chit-ê 背景之下，集合了一群對唸歌懷抱熱情 kap 使命感 ê 朋友，做伙守護 chit 項珍貴ê 文化遺產。

咱相信，唸歌 m̄-nā 是老一輩 ê 記持， koh 應該成做當代台灣人認識家己土地 kap 語言 ê 橋樑。透過學習唸歌，咱 m̄-nā 是 teh 學一種唱歌 ê 方式， koh 是 teh 找專屬於台灣人家己 ê 聲音。